வங்கக்கடலில் உருவாகியுள்ள காற்றழுத்த தாழ்வு நிலை காரணமாக தமிழகத்தில் அடுத்த சில நாட்களுக்கு கனமழை பெய்யும் என வானிலை ஆய்வு மையம் அறிவித்துள்ளது. இந்த தாழ்வு நிலை படிப்படியாக வலுவடைந்து மேற்கு நோக்கி நகர்ந்து வருகிறது. சென்னை, திருவள்ளூர், காஞ்சிபுரம், செங்கல்பட்டு, விழுப்புரம், கடலூர், திருவாரூர், நாகப்பட்டினம், தஞ்சாவூர் ஆகிய கடலோர மாவட்டங்களில் இடி மின்னலுடன் கூடிய கனமழை பெய்யும். நீலகிரி, கோயம்புத்தூர், ஈரோடு, சேலம் மாவட்டங்களிலும் மிதமான மழை எதிர்பார்க்கப்படுகிறது. மீனவர்கள் கடலுக்கு செல்ல வேண்டாம் என அறிவுறுத்தப்பட்டுள்ளது. வானிலை மையம் அறிவித்துள்ள எச்சரிக்கையை பொதுமக்கள் கவனத்தில் கொள்ள வேண்டும். அவசர சேவைகள் தயார்நிலையில் வைக்கப்பட்டுள்ளன.